Հայերենում տարածված սխալներ

Վիքիգրքեր-ից
Անցնել դեպի նավարկություն, որոնել

Քերականական սխալներ[խմբագրել]

Ոճաբանական թերացումներ[խմբագրել]

Սխալ Ճիշտ Նշումներ
Ես գտնում եմ որ... Կարծում եմ ռուսաբանություն
Գործը արվել է իմ կողմից։
Մայրիկի կողմից թխված հացը։
Գործը արել եմ ես։
Մայրիկի թխած հացը։
Հայերենում գործածվում է ներգործական սեռը։
Միտքը կիսել/կարծիքը կիսել համակարծիք լինել/նույն կարծիքին լինել/
համամիտ լինել/հասկանալ դիմացինի
մտահոգությունը/կարեկցել/վշտակցել
ինձ մեկ է ինձ համար մեկ է
ինձ հետաքրքիր է ինձ համար հետաքրքիր է, ինձ հետաքրքրում է
ինձ հաճելի է ինձ համար հաճելի է, ինձ հաճույք է պատճառում
ինչ-որ բանով ինչ-որ մեկի հետ կիսվել ինչ-որ բան ինչ-որ մեկի հետ կիսել. բաժնեկցել ռուսաբանություն (поделиться чем-то)
ուզում եմ ինչ-որ բան անեմ

ուզում ես ինչ-որ բան անես

ուզում եք ինչ-որ բան անեք

[վերաբերում է բոլոր դեմքերին, ժամանակներին, եղանակներին, օրինակ՝ կուզեի ինչ-որ բան անեյ]

ուզում եմ ինչ-որ բան անել

ուզում ես ինչ-որ բան անել

ուզում եք ինչ-բան անել

բոլոր դեպքերում օգտագործվում է անորոշ դերբայը

Ուղղագրական սխալներ[խմբագրել]

Սխալ Ճիշտ Նշումներ
իմ համար/մոտ/վրա/նման/հետ/պես ինձ համար/մոտ/վրա/նման/հետ/պես
ամսեկան ամսական ամիս+ական (ի↑)
օրեկան օրական օր+ական, բայց տարեկան=տարի+ական (իա>ե)
ավելնորդ ավելորդ
կապնվել կապվել, կապ հաստատել
խաբնվել խաբվել
շնորհակալ եմ բոլորից/ձեզնից շնորհակալ եմ բոլորին/ձեզ ։
սիրահարվել մեկի վրա սիրահարվել մեկին
բուն դա կենդանի է բուն կենդանի է ռուսաբանություն
խոսքս պատուհանին է վերաբերվում խոսքս պատուհանին է վերաբերում վերաբերվելը վարմունքի մասին է
հույսով եմ հուսով եմ միավանկանի բառի «ույ»-ը բազմավանկանի բառի վերածվելիս շեշտը չկրող վանկում «ու»-ի է վերածվում
դեպի հետ հետ «հետ»-ն ինքնին ուղղություն է արտահայտում
դեպի առաջ առաջ «առաջ»-ն ինքնին ուղղություն է արտահայտում
երկու կատուներ ծառ են բարձրանում երկու կատու ծառ են բարձրանում թվական ածանցով անորոշ հոգնակուն «-եր» կամ «-ներ» չի ավելանում
իմ երկու կատուն իմ երկու կատուները որոշյալ հոգնակուն միշտ «-եր» կամ «-ներ» է ավելանում
Նրան ասա, որ նրան կանչում են Նրան ասա, որ իրեն կանչում են
ուսուցիչը հանդիսանում է քաղաքակրթության սյունը ուսուցիչը քաղաքակրթության սյունն է ռուսաբանություն
ձեր անունն ինչպես է ձեր անունն ինչ է
այս բաղադրատոմսի հաջողությունը կայանում է պղպեղի մեջ այս բաղադրատոմսի հաջողությունը պղպեղի մեջ է ռուսաբանություն
կանչել են, որպեսզի գնամ կանչել են, որ գնամ
հըլը, հըլը որ դեռ, դեռևս «հըլը»-ն արաբերեն բառ է, որը պարսկերենի միջոցով է անցել հայերենին
խոսքի ենթադրենք/օրինակ/դիցուք
խոսացած խոսած
ըստ ինձ ըստ իս
ասենք թե՝ ասենք՝
սաղ լրիվ, ամբողջ, ողջ, կենդանի «սաղ»-ը թուրքերեն բառ է
հրապարակի վրա հանդես է հրապարակում հանդես է
դա իմ դուրս է գալիս դա ինձ դուր է գալիս պարսկաբանություն
խոսքը գնում է թերթի մասին խոսքը թերթի մասին է ռուսաբանություն
պետք է ասել, պետք է նշել, ուզում եմ տեղեկացնել ի դեպ, ի միջիայլոց
այսինչի կողմից ասվել է այսինչն ասել է
նա մի կողմից ծուլանում էր, մյուս կողմից փորձում ավարտել նա ծուլանում էր, միաժամանակ փորձում ավարտել - կամ - թեև նա ծուլանում էր, բայց փորձում էր ավարտել անգլերենից ազդված (on one hand, on the other hand)
քեզ մոտ կստացվի դու կհաջողես, հաջողության կհասնես
նուռը իրենից ներկայացնում է սննդարար միրգ նուռը սննդարար միրգ է ռուսաբանություն
ինչո՞ւմն է բանը ի՞նչ է պատահել, ի՞նչ կա, ի՞նչ է եղել Առաջին տարբերակը ևս ճիշտ է:
հարցը բարձրացնել հարցը քննարկել/շոշափել/արծարծել/բարձրաձայնել/վեր հանել ռուսաբանություն
ակնոցներս տուր ակնոցս տուր ռուսաբանություն
ակնոց/ձեռնոց/գլխարկ հագնել ակնոց/ձեռնոց/գլխարկ կրել/դնել
դասել շարքը/թիվը/կարգը դասել շարքին/թվին/կարգին
նպատակ հետապնդել նպատակ ունենալ, նպատակադրվել
անհայտ կորած անհետ կորած «հետք» և ոչ «հայտնի» արմատից
ծանոթացա թանգարանի հետ ծանոթացա թանգարանին
էլ ավելի ավելի Առաջին տարբերակը ևս ճիշտ է:
լայն հասարակություն հասարակության շատ շերտեր/խավեր
պարտվել մեկին մեկից պարտվել ոչ, պարտվել մեկին
ճաշ պատրաստել ճաշ եփել
դասը պատրաստել դասը սովորել ռուսաբանություն
գնի թանկացում գնի բարձրացում, գնի աճ, ապրանքի թանկացում
ինձ հրավերք է ուղարկել ինձ հրավեր է ուղարկել «հրավերք» նշանակում է խնջույք
հայերեն լեզու հայերեն «-երեն» վերջածանցն արդեն նշանակում է «լեզու»
մեղանչեցի հանուն հանգիստ խղճի մեղքս քավեցի/ապաշխարեցի/մեղքս խոստովանցի հանուն հանգիստ խղճի մեղանչել նշանակում է մեղք գործել
հոգեբարձու հոգաբարձու «հոգս» և ոչ «հոգի» արմատից է այս բառը
այսօր առավել, քան երբեք այսօր առավել, քան երբևէ
չոր գինի դառը գինի
ծնունդդ շնորհավոր ծննդյանդ տարեդարձը շնորհավոր
չեմ ուզում կրկնվել չեմ ուզում կրկնել
սառեցի/ սառչեցի սառա
հանգեց հանգավ
հագցրեցի հագցրի
հոգեբարձու հոգաբարձու
բարետես արտաքինով աղջիկներ բարետես աղջիկներ «տես»-ը «տեսք» բառից է, որը նաև արտաքին է նշանակում
ներկաների մեծ մասը ծափահարեցին ներկաների մեծ մասը ծափահարեց «մասը» եզակի է, հետևաբար ստորոգյալն էլ եզակի պիտի լինի
արձանը փողոցի վրա արձանը փողոցում
մատեր մատներ
խոսալ խոսել
փախնել փախչել
ցրտից սառել ցրտից սառչել
հորմոնալ հորմոնային
հիշացնել հիշեցնել
գերանալ գիրանալ
անձեռնոցիկ անձեռոցիկ
իրանց իրենց
հավաքածո հավաքածու
ժողովածո ժողովածու
իմաստալից իմաստալի
գլուխս պտտվում է գլխիս պտտվում է
կամուրջի կամրջի
իր մեջ ներառում է ներառում է
պոչին նստել հետևել
կրկին անգամ կրկին, վերստին
վայրենի աղջիկ վայրի աղջիկ
ավիրել ավերել
ներ է կրված Ռուսաստանից ներկրված է Ռուսաստանից -ներ նախածանցը չի կարող տրոհվել բառից և հանդես գալ առաձին:
քայլելուց խոսել քայլելիս խոսել «քայլելուց» նշանակում է՝ քայլելու պատճառով, «քայլելիս» նշանակում է՝ քայլելու ընթացքում
հինգին վեց պակաս հինգից վեց է պակաս
երեկոյան ժամը 19-ին երեկոյան ժամը 7-ին
կցույց տամ ցույց կտամ ռուսաբանություն
երեկոյան ժամը 19-ին երեկոյան ժամը 7-ին
համաձայնել ասածների հետ համաձայնել ասածներին
սիրահարվել նրա վրա սիրահարվել նրան
ներողություն խնդրել նրան ներողություն խնդրել նրանից
տեղյակ լինել դեպքի մասին տեղյակ լինել դեպքից/դեպքին
իմ մոտ/վրա/պես/նման/համար ինձ մոտ/վրա/պես/նման/համար սակայն ճիշտ է՝ մեր մոտից/մոտով/մոտի
տեղյակ լինել դեպքի մասին տեղյակ լինել դեպքից/դեպքին
ծիծաղալ ծիծաղել
սառչելով սառելով
սառում ենք սառչում ենք
կաշվեգործ կաշեգործ
վայրկյանական վայրկենական
առօրյական առօրեական
ութանասուն ութսուն

Ուղղագրական սխալներ[խմբագրել]

Սխալ Ճիշտ Նշումներ
չե չէ «չէ»-ն բարդ բառ է՝ կազմված «չ» նախածանցից և «է» բայից, որի պատճառով էլ պահպանվում է երկրորդ արմատի սկզբնատառը
որևե որևէ «որևէ»-ն ևս բարդ բառ է՝ կազմված «որ», «և» և «է» բառերից, որի պատճառով էլ պահպանվում է երրորդ արմատի սկզբնատառը
սխմել սեղմել
դեղերը ետ չեն ընդունվում դեղերը հետ չեն ընդունվում հին ուղղագրությունից նոր ուղղագրության անցնելիս՝ «յետ»->«հետ» տառադարձության
փոխարեն «յետ»->«ետ» սխալ տառադարձման հետևանքն է
լռիվ լրիվ
ՈՒկրաինա Ուկրաինա ճիշտ ձեւը՝ «Ու»
ԲԱՐԻ ԳԱԼՈւՍՏ ԲԱՐԻ ԳԱԼՈՒՍՏ բոլոր տառերը մեծատառ գրելիս նաև Ւ (վյուն) տառն է մեծատառ գրվում
Հայկական Սովետական Հանրագիտարան «Հայկական սովետական հանրագիտարան» հայերենում քանի բառից բաղկացած հատուկ անվան միայն առաջին տառն է մեծատառ գրվում․ հատուկ անվան ամբողջությունը ցույց տալու համար այն ներառվում է չակերտների (« ») մեջ
Շահ Աբաս Շահ-Աբաս
Սայաթ Նովա Սայաթ-Նովա
ինչ որ ինչ-որ Գծիկով է գրվում անորոշ դերանունը, իսկ հարաբերական դերանունը՝ ոչ: Ինչ-որ մի օր, ինչ-որ մի տեղ, կհանդիպենք մենք իրար որպես անծանոթներ... և Ինչ որ կա իմ սրտում, բոլորը ձեզ, բոլորը ձեզ...
շուտ շուտ շուտ-շուտ
փոքր ինչ փոքր-ինչ
Խնկո Ապեր Խնկո-Ապեր
Պրագա Պրահա
հիփոթեքային հիպոտեկային
Հաիթի Հայիթի
Կոստանդնապոլիս Կոստանդնուպոլիս
Պաստերնակ Պաստեռնակ
Սմիրնով Սմիռնով
Եվրոմիություն Եվրամիություն
Եվրոտեսիլ Եվրատեսիլ Եվր փոխառյալ արմատը ա հոդակապով միանում է հաջորդ արմատին, ինչպես էլեկտր փոխառյալլ արմատ: Էլեկտրասյուն, էլեկտրաէներգիա և այլն:
Մանրե Մանրէ բարդ բառ կազմված «մանր» և «է» (լինել, էակ, էություն) արմատներից:

Կետադրական սխալներ[խմբագրել]

Սխալ Ճիշտ Նշումներ
անունդ ինչ է? անունդ ի՞նչ է պարույկը դրվում է հարցական բառի վերջին ձայնավորի վրա
միթե՞ այդպես է մի՞թե այդպես է «միթե»-ի վրա որպես բացառություն պարույկը դրվում է առաջին ձայնավորի վրա
եկա,տեսա,հաղթեցի եկա, տեսա, հաղթեցի ստորակետից, միջակետից, վերջակետից, և փակման չակերտից հետո պետք է դնել մեկ բացատ
ինչ հիանալի հանդես էր! ի՜նչ հիանալի հանդես էր, ի՛նչ հիանալի հանդես էր,
ինչ հիանալի՜ հանդես էր
հայերեն կետադրությունում «!» նշանը չկա
<<Հայաստան>> հիմնադրամ «Հայաստան» հիմնադրամ < և > նշանները մաթեմատիկական համեմատական նշաններ են
"Հայաստան" հիմնադրամ «Հայաստան» հիմնադրամ հայերեն կետադրությունում «" "» նշան չկա
շա~տ եմ սիրում շա՜տ եմ սիրում հայերեն կետադրությունում «~» նշան չկա
Չ՛ծխել, չ՛խմել, չ՛թափել, չ՛ջնջել Չծխել, չխմել, չթափել, չջնջել հայերենում չ-ով ձևերը չեն շեշտվում:

Աղբյուրներ[խմբագրել]